Lukmançylygyň taryhynda ilkinji gezek emeli aň tarapyndan dolandyrylýan robot hirurgiki operasiýanyň çylşyrymly bölegini özbaşdak amala aşyrdy. Bu barada Jons Hopkins uniwersitetiniň synagy geçiren barlagçylaryna salgylanýan Reuters agentligi ýazýar.
Öt haltasyny aýyrmak boýunça operasiýa wagtynda synag edilýän robot hirurg gatyşmazdan işiň esasy bölekleriniň birini ýerine ýetirdi. Lukmanlar tarapyndan dolandyrylýan adaty ulgamlardan tapawutlylykda, täze işläp taýýarlama emeli aňy hakyky wagtda çözgüt tapmak üçin ulanýar hem-de ol anatomiýanyň üýtgemegine we bolup biläýjek kynçylyklara uýgunlaşyp bilýär.
Taslamanyň ýolbaşçysy professor Aksel Kriger enjamyň, hatda kyn şertlerde-de adam eliniň işi bilen deňeşdirip boljak takyklygy we durnuklylygy görkezýändigini aýtdy.
Alymlaryň sözlerine görä, bu tehnologiýa geljekde şol bir amallary awtomatlaşdyryp, lukmanlaryň iş ýüküni azaldyp we ýokary tehnologiýaly lukmançylyk kömeginiň elýeterliligini ýokarlandyryp biler. Şol bir wagtyň özünde, işläp düzüjiler ulgamyň synag döwründedigini we heniz giňden ulanylmaga taýyn däldigini nygtaýarlar.
