10-njy iýulda Türkmenistanyň daşary işler ministri Raşid Meredow Belarus, Moldowa, Burundi we Çad Respublikalarynyň daşary işler ministrleri bilen telefon arkaly söhbetdeşlikleri geçirdi. Bu barada Türkmenistanyň DIM-nde habar berdiler.
Söhbetdeşligiň dowamynda şu ýylyň awgust aýynda Türkmenistanda geçiriljek BMG-niň Deňze çykalgasy bolmadyk ösüp barýan ýurtlar boýunça üçünji maslahatyna (LLDC 3) taýýarlyk meselelerine üns berildi.
Belarus Respublikasynyň daşary işler ministri Maksim Ryženkow bilen söhbetdeşligiň dowamynda taraplar türkmen-belarus hyzmatdaşlygynyň häzirki ýagdaýyny ara alyp maslahatlaşdylar we ikitaraplaýyn gatnaşyklary mundan beýläk hem berkitmäge gyzyklanma bildirdiler.
Moldowa Respublikasynyň daşary işler ministri Mihai Popșoi bilen söhbetdeşligiň dowamynda türkmen-moldowa hyzmatdaşlygynyň möhüm ugurlary ara alnyp maslahatlaşyldy.
Burundi Respublikasynyň daşary işler we ösüş maksatly hyzmatdaşlyk ministri Alber Şingiro bilen söhbetdeşlikde özara gyzyklanma bildirilýän ugurlarda ikitaraplaýyn hyzmatdaşlygy giňeltmegiň geljegine garadylar.
Çad Respublikasynyň daşary işler, afrikan integrasiýasy we daşary ýurtdaky çadlylaryň işleri boýunça ministri Abdulaýe Sabre Fadul bilen söhbetdeşlikde ikitaraplaýyn gatnaşyklaryň häzirki ýagdaýyna we ösdürmegiň geljegine garadylar.
