J.D. Power amerikan kompaniýasy tarapyndan geçirilen 2025-nji ýylyň täze awtoulaglarynyň hil derejesi boýunça barlag dürli awtoulag brendleriniň ygtybarlylygynda uly tapawutlaryň bardygyny ýüze çykardy. Pikir soraşma 92 694 sany adam gatnaşyp, olar ulaglaryny satyn alan pursadyndan başlap, ilkinji 90 gününiň dowamyndaky ýagdaýyna baha berdiler.
Bazaryň ortaça görkezijisi her 100 awtoulagda 192 näsazlyk boldy. Iň köp mesele ýüze çykan brendleriň hatarynda Audi bilen Volvo bar (degişlilikde, 269 we 258 näsazlyk). Şeýle-de Infiniti, Volkswagen we Mazda-nyň görkezijileri hem bularyňkydan sähelçe az boldy.
Iň ygtybarly brendler hökmünde Lexus (166 näsazlyk), Nissan (169), Hyundai (173) we Jaguar (175) görkezildi. Şeýle-de Chevrolet, Honda we Kia hem gowy netijeleri görkezdi.
Gözlegde elektromobillere aýratyn üns berildi. 2025-nji ýylyň doly elektrikli modellerinde ortaça her 100 awtoulagda 212 näsazlyk ýüze çykdy, bu bolsa plagin gibridlerine garanyňda (237 näsazlyk) has pesdir.
Tesla kompaniýasy ýagdaýyny gowulandyrdy: her 100 ulagda näsazlyk derejesi 200-e çenli peseldi, bu bolsa geçen ýyl bilen deňeşdireniňde 62 näsazlyk az diýmekdir.
J.D. Power gözlegiň çäginde Porsche 911 modelini iň az näsazlyk bilen tapawutlanan awtoulag hökmünde aýratyn belläp geçdi.
Bu maglumatlar täze ýeňil awtoulag satyn almak isleýän alyjylar üçin iň az mesele döredýän modelleri saýlap almaga kömek edip biler.
