Toyota kompaniýasy ozal 2027-nji ýylda bazara çykarylar diýlip meýilleşdirilen "Lexus LF-ZC" elektrik awtoulagyny tapgyrlaýyn öndürmek meýilnamalaryndan ýüz öwürdi. "Nikkei" agentliginiň habar bermegine görä, munuň sebäbi dünýä bazarynda elektrik awtoulaglaryna bolan islegiň peselmegidir.
"Lexus LF-ZC" konsepty ilkinji gezek 2023-nji ýylyň güýzünde markanyň geljekki elektrik awtoulaglarynyň neslini görkezmek maksady bilen tanyşdyrylypdy. Şonda modeliň bir gezek zarýad bermek bilen takmynan 1000 kilometr ýol geçip biljekdigi habar berlipdi.
Başlangyç meýilnamada tapgyrlaýyn wersiýanyň 2026-njy ýylda çykarylmagyna garaşylýardy, soňra möhletler 2027-nji ýylyň ortalaryna süýşürildi. Indi bolsa taslama dolulygyna ýatyryldy.
Şunuň bilen birlikde, Toyota elektrik ulaglary pudagyndaky geljekki gözleglerden ýüz öwürmeýär. Kompaniýa gaty jisimli akkumulýatorlary we iri alýumin böleklerini bitewi guýmak usulyny göz öňünde tutýan "Gigacast" tehnologiýasy boýunça işleri dowam etdirer.
Bu çözgütleriň ýapon awtoulag öndürijisiniň geljekki modellerinde ulanylmagyna garaşylýar.
Ozal analitikler bütin dünýäniň elektrik awtoulag bazarynyň ösüş depgininiň haýallajakdygyny çaklapdylar. Olaryň bahalandyrmagyna görä, 2026-njy ýylda şeýle awtoulaglaryň satuwy takmynan 23,9 million birlige ýeter, ösüş depgini bolsa häzirki 20%-den 15,7%-e çenli peseler.
