24-nji iýunda Türkmenistanyň daşary işler ministriniň orunbasary Ahmet Gurbanow Beýik Britaniýanyň Ýewropa, Demirgazyk Amerika we deňiz aňyrsy ýurtlar boýunça döwlet ministri Stiwen Dauti bilen telefon arkaly söhbetdeşlik geçirdi. Bu barada Türkmenistanyň DIM-niň Metbugat gullugy habar berýär.
Britan tarapynyň ýolbaşçylygy, Ýakyn Gündogarda emele gelen çylşyrymly ýagdaý bilen baglanyşykly, Beýik Britaniýanyň raýatlarynyň Eýrandan çykmagyna ýardam edenligi üçin Türkmenistanyň ýolbaşçylaryna minnetdarlyk bildirdi. Bu ädim Türkmenistanyň ynsanperwerlik ýörelgelerine ygrarlydygyny görkezýär diýlip bellenildi.
Taraplar syýasy-diplomatik we söwda-ykdysady ugurlardaky hyzmatdaşlygy ara alyp maslahatlaşdylar. Hususan-da, şu ýylyň mart aýynda Aşgabatda geçirilen “Türkmenistanyň geljegine maýa goýumlar” (IFT-2025) atly halkara maýa goýum forumyna britan hususy toplumynyň wekilleriniň gatnaşmagynyň netijeliligi nygtaldy.
Şeýle-de, sebitleýin gün tertibi we 2025-nji ýylyň ikinji ýarymy üçin meýilleşdirilen çäreler bilen baglanyşykly meseleler ara alnyp maslahatlaşyldy. Iki ýurduň daşary syýasat edaralarynyň arasynda yzygiderli gepleşikleriň dowam etdirilmeginiň möhümdigi nygtaldy.
Söhbetdeşligiň ahyrynda britan tarapy Türkmenistanyň beren ynsanperwer kömegi üçin ýene bir gezek minnetdarlyk bildirdi.
