Ýaponiýanyň Ýamanasi prefekturasynda adaty asfalt ýollardan hereket etjek rezin tigirli üýtgeşik tramwaýy işe girizmäge taýýarlyk görülýär. Ýöne onuň hereketi magnit markerleriniň ulgamy bilen çäklendiriler.
The Asahi Shimbun neşiriniň habar bermegine görä, täze ulag görnüşi Fudzi dagyna barýan alpinistler we syýahatçylar üçin niýetlenýär. Aslynda, ol trolleýbusy ýada salýar: oňa relsler gerek däl, ol diňe ýollara gurnalan magnit liniýasy boýunça hereket edýär, şol sebäpli erkin gyşaryp ýa-da öwrülip bilmeýär.
Ýerli häkimiýetler howpsuzlyk, baha, ýolagçy akymyny sazlamak we rahatlyk ýaly ölçegleri göz öňünde tutup, jemgyýetçilik ulaglarynyň dürli görnüşlerini gözden geçirdi. Netijede, “Fudzi-tramwaý” deslapky adyny alan rezin tigirli tramwaý saýlandy.
Magnit ugrukdyryş ulgamy köpçülikleýin syýahatçylyk bilen baglanyşykly meseleleri çözmek üçin iň amatlysy diýlip hasaplandy. ÝUNESKO-nyň Bütindünýä mirasynyň obýekti bolan Fudzi dagy her ýyl köp sanly myhmanlary özüne çekýär.
Täze ugur Fudziniň etegini deňiz derejesinden 2300 metr beýiklikde 5-nji stansiýa bilen birleşdirer. Ýolda tramwaý demirgazyk eňňidiň owadan ýerlerinden, şol sanda Kawaguçiko kölünden geçer.
Täze ulag görnüşi işe girizilenden soň, beýleki görnüşli ulag serişdelerine Fudzi-Subaru liniýasy boýunça hereket gadagan ediler. Bu çözgüt soňky ýyllarda barha artýan syýahatçylaryň akymyny çäklendirmek üçin kabul edildi.
