Žiçžao şäher okrugynda (Şandun welaýaty, Hytaý) seýilgähdäki abatlaýyş işleri wagtynda arheologlar üç gadymy aramgähiň üstünden bardy. Bu barada Hytaýyň jemgyýetçilik ylymlary akademiýasynyň Arheologiýa institutyna salgylanyp, Independent habar berýär.
Aramgählerden ikisi talanan bolup, biri asla ellenmedik diýen ýaly. Olarda jemi 70 töweregi predmet, şol sanda bürünç aýnalar, keramika, agaç çelekler, saç üçin bambuk gysgyçlary, mis möhürler, çotgalar, demir gylyçlar we ildirgiçler tapyldy.
Aramgähleriň birinde arheologlar Huan Szýa ady bilen bürünç möhüri tapdy. Iki aramgähde Huan familiýasy ýazylypdyr. Ylmy gözlegçiler bu ýerde garyndaşlaryň, ähtimal, är-aýalyň jaýlanandygyny çaklaýar.
Aramgähleriň golaýynda jesetleri jaýlama ýerine äkitmek üçin ulanylyp bilnen arabanyň yzlary tapyldy.
Aramgählerdäki süňklere düýpli zeper ýetipdir, şol sebäpli jaýlama däpleri barada maglumat bilmek başartmady. Hünärmenleriň hasaplamalaryna görä, tapyndylar b.e.öň 206-njy ýyldan b.e. 220-nji ýylyna çenli sebitde hökümdarlyk eden Han nesilşalygynyň döwrüne degişlidir.
