Tesla-nyň bazar bahasy bir günde 150 mlrd dollar arzanlady. Elektrokar öndürijisiniň paýnama bahalarynyň pese gaçmagy sebäpli, kompaniýanyň ýolbaşçysy Ilon Maskyň öz baýlygy bir günde birbada 33,9 mlrd dollar azaldy diýip, Reuters habar berýär.
Belläp geçsek, milliarderiň baýlygynyň uly bölegini Tesla-nyň paýnamalary üpjün edýär.
Kompaniýanyň gymmatly kagyzlary Maskyň ABŞ-nyň Prezidenti Donald Tramp bilen düşünişmezliginden soň arzanlady. Ozal Mask Trampy saýlaw kampaniýasynda goldapdy, Tramp bolsa telekeçini “birinji dosty” diýip atlandyrdy. Ýöne şu hepde milliarder Ak tamyň ýolbaşçysynyň salgytlar we býujet baradaky täze kanun taslamasyny ýiti tankytlap çykyş etdi. Muňa jogap hökmünde Tramp Truth Social platformasynda Maskyň kompaniýalaryny döwlet kömeginden we şertnamalardan mahrum etmek bilen haýbat atdy.
Mask hem sosial ulgamlarda tankydy postlar bilen jogap berdi. Şondan soň penşenbe güni Tesla-nyň paýnamalary üç sagatda 14% arzanlady, bazar bahasy bolsa 150 mlrd dollar pese gaçdy. Käbir maýadarlar kompaniýanyň kagyzlaryny işjeň satyp başlady.
Anna güni paýnamalar bölekleýin dikelip, 5% ýokarlandy. Bu Mask bilen Trampyň arasynda bolup biljek telefon gepleşikleri baradaky habaryň esasynda bolup geçdi.
Bilermenleriň pikiriçe, Tramp bilen dawa Tesla-nyň we Maskyň beýleki taslamalarynyň ýagdaýyny kynlaşdyryp, düzgünleşdiriji edaralaryň üsti bilen onuň işine täsir edip biler. Hususan-da, ABŞ-nyň Ulag ministrligi rulsuz hem pedalsyz döredilen Tesla robotaksileriniň ykbalyny kynlaşdyryp biler.
Mundan başga-da, döwlet Maskyň kompaniýalary bilen şertnamalary bes edip biler. Bu ýagdaýdan, esasan, NASA-dan, Pentagondan we aňtaw gullugyndan uly şertnamalary alýan SpaceX zyýan çeker.
ABŞ-da, Ýewropada we Hytaýda Tesla brendiniň meşhurlygy häzirem pese gaçmagyny dowam etdirýär. Hytaýda Tesla-ny özüne çekiji marka hasaplaýan sarp edijileriň paýy birnäçe ýylda iki esseden gowrak azaldy. Aprel aýynda Ýewropanyň käbir bazarlarynda satuw antirekord derejä ýetdi. Şol bir wagtyň özünde, I çärýekde Ýewropada elektromobil satuwy 28% ýokarlandy, Tesla-nyň satuwy bolsa 37,2% pese gaçdy.
