Ýaponiýada emeli ganyň kliniki synaglaryna başlamaga taýynlanýarlar. Professor Hiromi Sakainiň ýolbaşçylygyndaky Nara lukmançylyk uniwersitetiniň hünärmenler toparynyň işläp taýýarlamasy, esasanam, adatdan daşary ýagdaýlarda we uzak sebitlerde donor ganynyň ýetmezçiliginiň meselesini çözüp biler.
Emeli gan gorag gabygyna ýerleşdirilen möhleti geçen donor ganyndan alnan gemoglobinden döredilýär. Şeýle ganda wirus bolmaýar we toparyny saýlamagy talap etmeýär, bu bolsa öňünden dogry gelýänini-gelmeýänini barlamazdan ulanmaga mümkinçilik berýär. Mundan başga-da, saklanyş möhleti bir aýdan köp bolmadyk adaty donor ganyndan tapawutlylykda, ony otag temperaturasynda iki ýyla çenli saklap bolýar.
Kliniki synaglara 2025-nji ýylyň mart aýynda başlanar. Oňa 100 millilitrden 400 millilitre çenli emeli gan goýberiljek 16 sany sagdyn meýletinçi gatnaşar. Eger bu tapgyrda ganyň hiç hili zyýanly tarapy tapylmasa, barlag giňeldiler.
Tehnologiýany 2030-njy ýyla çenli lukmançylyk tejribesine ornaşdyrmak isleýärler.
Emeli ganyň işlenip taýýarlanmagy Ýaponiýa üçin has möhümdir, bu ýerde ilatyň garraýandygy we dogluşyň derejesiniň pesdigi sebäpli donor gany ýetmezçilik edýär. Täze tehnologiýa, esasanam, adatdan daşary ýagdaýlarda, şol sanda onkologiki kesellerde, ýol-ulag heläkçiliginde ýa-da başga betbagtçylyklarda ejir çekenler üçin transplantasiýa prosesini ep-esli aňsatlaşdyryp we çaltlaşdyryp biler.
