Sankt-Peterburg döwlet uniwersitetiniň (SPbGU) alymlary germaniýaly we daniýaly kärdeşleri bilen bilelikde maşyn okuwyna esaslanýan syýany derňemegiň algoritmini döretdiler. Bu usul DCA ML diýlip atlandyryldy diýip, uniwersitetiň metbugat gullugyna salgylanýan TASS habar berýär.
"Kompýuter algoritmleri galp resminamalary arzan we ygtybarly kesgitlemäge hem-de syýany ýokary takyklyk bilen klassifikasiýa etmäge mümkinçilik döreder" diýip habarda aýdylýar.
Syýanyň derňewi kazyýet işiniň möhüm bölegidir. Ol resminamalaryň hakykylygyny kesgitlemäge, ýazylan wagtyny we bolup biljek galplyklary kesgitlemäge mümkinçilik berýär. Adaty usullar köplenç gymmat düşýär we nusgalara zeper ýetirip biler.
Sankt-Peterburg döwlet uniwersitetinde ulanylýan sanly reňk derňewi (DCA) asyl nusgasyna fiziki galtaşmazdan, syýany öwrenmek üçin resminamalaryň şekillerini ýa-da skanerlerini ulanýar. Alymlar bu çemeleşmäni takyklygy ýokarlandyrýan maşyn okuwy bilen birleşdirip kämilleşdirdiler.
Döredilen usul agressiw reagentleri talap etmeýär we resminamalaryň gurluşyny bozmaýar. Ol gadymy kagyzlary, gollary we sungat eserlerini seljermek üçin ulanylyp bilner.
Barlagçylar geljekde DCA ML tehnologiýasynyň kazyýet işinde we medeni mirasy gorap saklamakda möhüm gurala öwrüljekdigine ynanýarlar.
