Aprel aýynda Ginnesiň rekordlar kitaby täze üstünligi hasaba aldy: Wýetnamyň asmanyna bir wagtyň özünde 10 518 kwadrokopter galyp, dünýäde iň uly yşyk şüweleňini geçirdi. Bu barada Interesting Engineering habar berýär.
Öňki rekord Hytaýa degişlidi – 2024-nji ýylda Şençžendäki dron şüweleňine 10 197 dron gatnaşdy. Rekordlaryň ikisi-de Damoda hytaý kompaniýasy tarapyndan goýuldy.
Wýetnamdaky şüweleň Günortanyň azat edilmeginiň we Milli birleşmäniň (1975-nji ýylyň 30-njy apreli) 50 ýyllygyna bagyşlandy. Ony daşary ýurt hyzmatdaşlarynyň goldaw bermeginde Wýetnamyň Prowtech International Vina kompaniýasy maliýeleşdirdi. Tehniki bölegini dron ulanmak bilen yşyk şüweleňlerini guramakda öňdebaryjy hasaplanýan Damoda üpjün etdi.
Şüweleň Saigon Riverside Park-da geçdi. Asmanda dronlar dürli nagyşlary, şeýle-de ýurduň taryhyndan sahnalary döretdi. Şol bir wagtyň özünde, esasy şüweleň ýatyryldy, Ginnesiň rekordlar kitaby 28-nji aprelde geçen esasy taýýarlygyň netijesini hasaba aldy.
Çäräni ýatyrmagyň resmi sebäbi aýdylmaýar. Çeşmäniň maglumatlaryna görä, bu mahabat elementleriniň bolmagy bilen baglanyşykly bolup biler. Çykyş wagty dronlar asmanda mahabatly şekilleri görkezdi. Olary horeografiýany bozmazdan aýyrmak mümkin däl: şüweleň müňlerçe enjamyň üznüksiz hereketinden ybarat bolup, birnäçe gün galanda programma üýtgeşme girizmek tehniki taýdan kyn düşýär.
Kynçylyklara garamazdan, hünärmenler dronlar toparyny dolandyrmagyň kämilleşjekdigine we şüweleňiň geriminiň artjakdygyna ynanýar.
