Merilendden InventWood amerikan kompaniýasy Superwood ady bilen täze gurluşyk materialyny hödürledi. Ol tebigy agajyň häsiýetlerini saklaýar, ýöne şol bir wagtyň özünde berkligiň agrama gatnaşygy boýunça polatdan 10 esse berk diýip, Interesting Engineering neşiri ýazýar.
Kompaniýanyň maglumatlaryna görä, material adaty agaçdan 10 esse berk we gatydyr. Ol oda, suwa çydamly we çüýremäge hem-de zyýankeşlere garşy durnukly.
Bu işläp taýýarlama agaç modifikasiýasy ugrunda alnyp barlan ylmy gözlegleriň netijesinde mümkin boldy. Tehnologiýa Merilend uniwersitetiniň professory Lýanbin Hu ýolbaşçylyk etdi. Onuň topary agaçdan bellibir öýjük komponentlerini aýryp, onuň gurluşyny üýtgetdi we ýörite bejergileri ulandy.
Netijede, agajyň daşky görnüşini we ýylylygyny saklaýan, ýöne has gowy ulanylyş aýratynlyklaryna eýe bolan berk kompozit alyndy.
Kompaniýa eýýäm 50 mln dollar maýa goýumy özüne çekdi. Bu serişdeler Frederikde (Merilend ştaty) önümçilige başlamaga gönükdiriler. Ilkinji täjirçilik üpjünçiligi 2025-nji ýylyň üçünji çärýeginde meýilleşdirilýär.
Ekolog Pol Hokeniň pikiriçe, Superwood – bu “gurluşygyň geljegini üýtgedip biljek hakyky öňegidişlik”. Material gurluşykda, awiasiýada we awtomobil gurluşygynda, şeýle-de mebel önümçiliginde ulanylyp bilner.
