2025-nji ýylyň 11-15-nji iýuny aralygynda Gyrgyzystanyň paýtagty Bişkekde III Halkara Bişkek kinofestiwaly geçiriler. Bu çärä beýleki ýurtlar bilen birlikde türkmenistanly kinematograflar hem gatnaşar.
Merkezi Aziýa ýurtlarynyň filmleri boýunça bäsleşik maksatnamasyna Nurmyrat Saryhanowyň "Kitap" hekaýasynyň esasynda düşürilen adybir çeper film girizildi. Filmi “Oguzhan” adyndaky “Türkmenfilm” birleşiginiň režissýory Hekim Alowow döretdi.
Filmiň wakalarynyň merkezinde — köçeşkli düýesini Magtymgulynyň goşgular ýygyndysyna çalşan Welmyrat aga durýar. Ol bu maşgala gymmatlygyny hiç hili pula satmakdan ýüz öwürýär.
“Kitap” filminiň ilkinji görkezilişi 2024-nji ýylyň noýabr aýynda Aşgabatda geçirilen IV Gorkut ata türki dünýäsiniň halkara kinofestiwalynda bolup geçdi. Şeýle hem 2025-nji ýylyň maý aýynda Türkiýäniň Izmir şäherinde geçirilen II “Turan” halkara kinofestiwalynda film baýrak bilen sylaglandy.
Bişkek kinofestiwaly ilkinji gezek 2023-nji ýylyň noýabrynda geçirilipdi. Ol Çingiz Aýtmatowyň doglan gününiň 95 ýyllygyna bagyşlanypdy. Şonda festiwalyň çäginde Türkiýe kino hepdeligi, Aýtmatow forumy, Merkezi Aziýa ýurtlarynyň filmleriniň görkezilişleri, şeýle hem milli we halkara bäsleşikler guralypdy. Şu ýylky çäre hem sebitiň kinematografiýasy bilen tomaşaçylary tanyşdyrmagy dowam eder.
