28-nji aprelde Prezident Serdar Berdimuhamedow Ykdysady Hyzmatdaşlyk Guramasynyň durnukly ösüş boýunça ministrler derejesindäki birinji forumyna gatnaşmak maksady bilen ýurdumyza gelen Gazagystanyň Premýer-ministriniň orunbasary, Hökümet Diwanynyň ýolbaşçysy Galymžan Koýşybaýewi kabul etdi.
Iki ýurduň arasyndaky hyzmatdaşlygyň häzirki ýagdaýy we ony ösdürmegiň mümkinçilikleri barada pikir alyşmalaryň dowamynda söhbetdeşler häzirki wagtda türkmen-gazak gatnaşyklarynyň özara düşünişmegiň, strategik hyzmatdaşlygyň ýokary derejesini görkezýändigini kanagatlanma bilen bellediler. Ýurtlarymyz syýasy, söwda-ykdysady, medeni-ynsanperwer ulgamlarda ýakyndan hyzmatdaşlyk edýärler, energetika, ulag-logistika pudaklarynda gatnaşyklary pugtalandyrýarlar. Türkmenistan we Gazagystan ýokary derejedäki netijeli dialogy yzygiderli esasda alyp barýarlar, hökümetara we pudagara hyzmatdaşlygy ösdürýärler.
Galymžan Koýşybaýew Gazagystanyň Türkmenistanyň döredijilikli daşary we içeri syýasatyny, Prezident Serdar Berdimuhamedowyň transmilli energetika, ulag geçelgelerini döretmek boýunça möhüm halkara başlangyçlaryny goldaýandygyny belledi. Bu başlangyçlar dünýä jemgyýetçiliginiň goldamagynda häzirki wagtda üstünlikli durmuşa geçirilýär.
Duşuşygyň dowamynda Serdar Berdimuhamedow türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyza doganlyk Gazagystanyň gadymy Türküstan şäherinde bildirilen myhmansöýerlik üçin minnetdarlygyny beýan etdi.
28-nji aprelde şeýle hem Gazagystanyň Premýer-ministriniň orunbasary Galymžan Koýşybaýewiň Türkmenistanyň daşary işler ministri Raşid Meredow bilen duşuşygy geçirildi. Duşuşygyň dowamynda taraplar syýasy-diplomatik, söwda-ykdysady we medeni-ynsanperwer ugurlardaky ikitaraplaýyn hyzmatdaşlygyň häzirki ýagdaýyny we ösdürmegiň geljegi uly ugurlaryny ara alyp maslahatlaşdylar.
Türkmenistanyň Halk Maslahatynyň Başlygy Gurbanguly Berdimuhamedow bilen Gazagystanyň Prezidenti Kassym-Žomart Tokaýewiň arasynda şu ýylyň aprel aýynda geçirilen duşuşygyň dowamynda gazanylan ylalaşyklary iş ýüzünde durmuşa geçirmek barada pikir alşyldy.
