22-nji aprelde Türkmenistanyň Bahreýn Patyşalygyndaky Adatdan daşary we Doly ygtyýarly ilçisi O.Çaryýew Bahreýniň Patyşasy Hamad bin Isa Al Halifa ynanç hatyny gowşurdy. Dabara Manama şäherinde Patyşanyň köşgünde geçirildi diýip, Türkmenistanyň DIM-niň metbugat gullugy habar berýär.
Ilçi diplomatik işini Er-Riýad şäherinde oturýan ýerinden alyp barar.
Ilçi O.Çaryýew Bahreýniň Patyşasyna we bu ýurduň halkyna Türkmenistanyň ýolbaşçylarynyň adyndan mähirli salamlary we iň gowy arzuwlary ýetirdi.
Hamad bin Isa Al Halifa Türkmenistanyň Prezidentine hem-de türkmen halkynyň Milli Lideri, Türkmenistanyň Halk Maslahatynyň Başlygyna mähirli salamyny we türkmen halkyna iň gowy arzuwlaryny beýan etdi.
Söhbetdeşligiň barşynda taraplar Türkmenistan bilen Bahreýn Patyşalygynyň arasyndaky dostlukly gatnaşyklary mundan beýläk hem ösdürmäge gyzyklanma bildirdiler.
