Apple kompaniýasy «Mulberry» kod ady bilen Health (Saglyk) goşundysynyň täze görnüşiniň üstünde işleýär. Bu goşundy saglyk we iýmit maglumatlaryny derňemek üçin emeli aňdan peýdalanýar diýip, «9to5mac» portaly ýazýar.
Emeli aň agentini türgenleşdirmek üçin kompaniýa lukmançylyk boýunça hünärmenleri işe kabul edýär. Programma üpjünçiligi Apple Health goşundysynda bar bolan we täzeleme wagtyna çenli ýygnanan ähli ulanyjy maglumatlaryny seljerer. Eger-de Apple Watch ulanylýan bolsa, maglumatlaryň möçberi, elbetde, has köpräk bolar. Şol maglumatlaryň esasynda bolsa, emeli aň agenti maslahatlary berer.
Esasy aýratynlyklaryň biri hem iýmitlenişi yzarlamak bolar. Ýöne bu ulgamyň işlemegi üçin, ähtimal, ulanyjylaryň iýýän iýmitleriniň gündeligini el bilen doldurmaly bolarlar.
Täzelenen Apple Health iOS 19.4 bilen bilelikde çykarylar.
