Şu gün, 3-nji aprelde Prezident Serdar Berdimuhamedow «Merkezi Aziýa – Ýewropa Bileleşigi» görnüşindäki birinji sammitine gatnaşmak maksady bilen Özbegistan Respublikasyna iş sapary bilen bardy.
Aşgabadyň Halkara howa menzilinde döwlet Baştutanyny ýurdumyzyň resmi adamlary ugratdylar.
Birnäçe wagtdan Türkmenistanyň Prezidentiniň uçary Samarkant şäheriniň Sammite gatnaşýan ýurtlaryň Döwlet baýdaklary bilen bezelen Halkara howa menziline gelip gondy.
Bu ýerde döwlet Baştutanymyzy resmi adamlar mähirli garşyladylar.
Serdar Berdimuhamedowy Özbegistanyň Premýer-ministri Abdulla Aripow we beýleki resmi wekiller mähirli garşyladylar.
Howa menzilinden Türkmenistanyň Prezidentiniň awtoulag kerweni sapar wagty özi üçin niýetlenen kabulhana tarap ugrady.
Sammit 3–4 aprelde geçirilip, oňa Türkmenistanyň, Gazagystanyň, Gyrgyzystanyň, Täjigistanyň we Özbegistanyň ýolbaşçylary gatnaşarlar. Ýewropa Bileleşigine Ýewropa Geňeşiniň Başlygy Antoniu Koşta we Ýewropa Komissiýasynyň ýolbaşçysy Ursula fon der Lýayen wekilçilik ederler.
