Ozal YouTube blogeri Mark Rober «Tesla Model Y» ulagynyň awtopiloduny synagdan geçirdi. Onuň maksady – ulagyň päsgelçilikleri dogry tanap-tanamaýandygyny barlamakdy. Emma Ilon Maskyň kompaniýasynyň awtoulagy bu synagdan geçip bilmedi – ol ýoluň üstünde goýlan, üstünde boş ýoluň şekili bolan diwary päsgelçilik hökmünde kabul etmedi we baryp urdurdy.
Indi bolsa başga bir bloger – Kaýl Pol şol synagy gaýtalady. Ol awtopilot wersiýasy 12.5.4.2 we HW3 kompýuteri bolan «Tesla Model Y» awtoulagyny, soň bolsa awtopilot wersiýasy 13.2.8 we HW4 kompýuteri bolan «Cybertruck-y» barlady.
«Model Y-niň» synagy Mark Roberiňki ýaly boldy – ol diwary päsgelçilik hökmünde kabul etmedi we ýoluny dowam etdirdi. Ulag diwara urmaz ýaly sürüji tormoza basmaly boldy.
Emma «Cybertruck» elektropikaby başgaça netije berdi. Onuň HW4/AI4 kameralary we kompýuter ulgamy diwary päsgelçilik hökmünde tanady we awtomatiki ýagdaýda saklandy. Munuň öňüsyrasynda sürüji ellerini ruldan aýryp, ulgamyň özbaşdak işleýändigini görkezdi.
Bu synag Tesla-nyň awtopilotlarynyň täze we köne nesilleriniň arasyndaky tapawudy açyp görkezdi. Şeýle hem Tesla-nyň lidar ýaly goşmaça datçiklerden ýüz öwürmegi barada soraglary ýüze çykardy. «Cybertruck» synagdan üstünlikli geçen hem bolsa, awtopilot ulgamynyň howpsuzlygy baradaky aladalary aradan aýyrmady.
