Xiaomi kompaniýasy Mýunhen şäherinde dizaýn we işläp düzüş merkezini açdy. Bu barada Pekinde geçirilen awtosalonyň dowamynda yglan edildi. Taslamanyň toparyna mundan ozal BMW we Porsche kompaniýalarynyň taslamalarynyň üstünde işlän hünärmenler goşuldy.
Merkeziň ýolbaşçysy wezipesine ozal BMW M4 modelini işläp düzmäge gatnaşan Rudolf Dittrih bellenildi. Awtoulaglaryň dinamikasy üçin bolsa BMW iX3-üň üstünde işlän Klaus-Diter Groll jogap berer. Dizaýn bölümini Mercedes-Benz Vision GT-niň döredilmegine goşant goşan Žan-Artur Madlen öz üstüne aldy.
Modelleriň daşky görnüşi üçin bolsa diňe bir ekstremal Porsche 911 däl, eýsem Lamborghini Temerario taslamasyna hem gatnaşan Fabian Şmels-Obermaýer jogap berer.
Bu merkeziň açylmagy kompaniýanyň Ýewropa bazaryna çykmak ugrundaky ädimi hökmünde görülýär.
Häzirki wagtda Xiaomi awtoulaglaryny diňe Hytaýda satýar, emeli aň we beýleki tehnologiýalary özünde jemleýän modelleriniň global derejä çykmagy bolsa 2027-nji ýyla meýilleşdirilýär. Onda ilkinji daşary ýurt bazary Ýewropa bolar.
Şeýle-de, Tesla-nyň Hytaýdaky bölüminiň öňki ýokary derejeli ýolbaşçysynyň hem kompaniýa goşulandygy we onuň içerki bazardaky satuwlar üçin jogap berjekdigi habar berilýär.
