Singapuryň NIPSEA kompaniýasynyň barlagçylary görünýän diapozonda 99,9%-e çenli ýagtylygy özüne siňdirmäge ukyply bolan aşa gara awtomobil örtügini işläp taýýarlady.
Boýag tehniki uglerodyň we uglerod nanoturbalarynyň suwly kompozit garyndysynyň esasynda döredildi. Işläp taýýarlaýjylaryň aýtmagyna görä, bu materiallaryň utgaşmasy diňe bir ýagtylygyň pigment tarapyndan siňdirilmegini däl-de, eýsem onuň örtügiň mikro-gurluşynyň içinde birnäçe gezek dargamagyny hem üpjün edýär. Materialyň ortaça serpikdiriş ukyby, takmynan, 0,08%-e deňdir.
Örtük elektron mikroskopyň aşagynda
Serpikdirme derejesiniň örän pesligi sebäpli, awtoulagyň üsti özüniň wizual relýefini ýitirýär we ony boşluk hökmünde kabul etmek mümkin. Şol sebäpli, munuň ýaly örtükler transportda ulanmagyň howpsuzlygy bilen bagly soraglary ýüze çykarýar. Bu täsiri azaltmak üçin barlagçylar solgun däl-de, ýylpyldawuk üstleri ulanmagy teklip edýär.
Şeýle-de, taslamanyň awtorlary çyglylygyň we temperaturanyň täsirine durnuklylyk synaglary barada habar berdi. Nusgalar 40°C temperaturada suwda on günläp we 95% çyglylykda 14 günläp hiç hili göze ilýän kemçilik bolmazdan saklanmagy başardy.
Işläp düzüjiler materialyň satuwa çykarylmagyndan öň, onuň durnuklylygy, çalmak üçin aňsatlygy we ulanyş ygtybarlylygy boýunça goşmaça barlaglardan geçmelidigini belleýär.
