Tesla kompaniýasynyň Fremontdaky zawodynda Model X elektrik krossoweriniň taryhda iň soňkusy ýygnaldy.
Zawodyň işgärleriniň biri Stiw Pennewell sosial mediada boýalmazdan öň zawodyň işgärleriniň gollary bilen bezelen kuzowyň suratyny ýerleşdirdi. Önümçilik desgalary indi Optimus gumanoid robotlaryny öndürmek üçin, täzeden gurnaldy.
Bar bolan maglumatlara görä, işgärleriň gollary soňky bezeg işleri wagtynda boýag bilen örtülipdir, ahyrky Model X bolsa nar gyzyl reňke boýalypdyr.
Awtoulagyň onuň özboluşly derejesini tassyklaýan ýörite ýadygärlik ýazgyjyk bilen enjamlaşdyrylmagyna garaşylýar.
Mundan öň, Model X we Model S modelleriniň soňky nusgalary iň ýokary derejeli aýratynlyklar bilen, çäklendirilen nusgadaky Signature Editions görnüşinde çykaryldy. Bellenilmeli zat, bu ulaglary satyn alyjylar kazyýet jogapkärçiligine çekilmek howpy astynda elektrik ulagynyň birinji ýylyň dowamynda gaýtadan satylmagyny gadagan edýän ylalaşyga gol çekdiler.
Tesla kompaniýasy Fremont zawodyndaky boşan önümçilik hatarlaryny Optimus antropomorfik robotlaryny köpçülikleýin öndürmek üçin ulanmagy meýilleşdirýär. Zawodyň kuwwaty ýylda bu androidleriň milliona çenlisini ýygnamaga mümkinçilik berýär. Söwda robotlarynyň önümçiligine şu tomusda başlamak meýilleşdirilýär.
