ABŞ-nyň meşhur blogeri we inženeri Mark Rober Tesla Model Y elektrik awtoulagyny diwara urdurdy. Agzalan diwaryň ýüzünde açyk we boş ýoluň şekili bardy, ol bu synag bilen Tesla-nyň datçik ulgamyndaky kemçilikleri görkezmek isledi diýip, «The Verge» neşiri ýazýar.
Tesla köpden bäri ulaglaryndaky käbir datçikleri artykmaç hasaplap, olary aýyrmak isleýär. Kompaniýa ýoluň ýagdaýyny kesgitlemek üçin gözüň we beýniniň ýeterlikdigini öňe sürüp gelýär. Häzirki wagtda Tesla-nyň sürüji kömekçi ulgamlary esasan bort kameralarynyň maglumatlaryna esaslanýar. Emma beýleki seresaply awtoulag öndürijileri öz ulaglaryna iň bolmanda ultrases datçiklerini goşýarlar. Şol datçiklerden iň ygtybarlysy bolsa, hatda ýaramaz howa şertlerinde-de päsgelçilikleri tanap bilýän lidar ulgamlarydyr.
Mark Rober ulaglaryň awtopilot ulgamlarynyň netijeliligini deňeşdirdi. Bir tarapdan, lidar bilen enjamlaşdyrylan Lexus krossoweriniň prototipi synagdan geçirildi. Beýleki bir tarapdan bolsa, diňe kameralaryň şekillerine esaslanýan Tesla Model Y synagdan geçirildi. Synaglaryň netijesinde, Tesla Model Y güýçli ümürde ýa-da ýagyş ýaganda pyýada manekeni görüp bilmedi.
Üstesine Ilon Maskyň awtoulagy iň möhüm synagdan hem geçip bilmedi. Synag üçin guramaçylar ýoluň üstüne uly diwar goýdular. Bu diwar ýörite işlenip taýýarlanan «foto diwar kagyzlary» bilen örtüldi. Netijede, Tesla Model Y-iň bort kameralary üstünde açyk we boş ýoluň şekili bolan bu illuziýany hakyky ýol diýip kabul etdi we doly tizlikde baryp, diwara urdy. Lidar bilen enjamlaşdyrylan prototip bolsa, bu «görünmeýän diwary» päsgelçilik hökmünde tanady we öz wagtynda saklanmagy başardy.
