Ilon Mask tarapyndan esaslandyrylan xAI kompaniýasy emeli aňyň kömegi bilen wideo döretmäge ýöriteleşen Hotshot startapyny satyn aldy. Bu ädim OpenAI-iň Sora we Google-yň Veo 2 ýaly wideo generatorlary bilen bäsdeşligi güýçlendirip, xAI-iň generatiw modelleri döretmekde mümkinçiliklerini giňelder.
San-Fransiskoda ýerleşýän Hotshot tekst beýanlaryny dinamiki wideolara öwürýän ösen EA modellerini döretdi. Ol ilkibaşda suratlary redaktirlemek gurallaryna ünsi jemledi, ýöne 2022-nji ýyldan soň diňe tekstleri wideo öwürmek bilen meşgullanyp başlady.
Iki ýylyň içinde onuň üç esasy modeli döredildi: Hotshot-XL, Hotshot Act One we Hotshot.
“Bu modelleriň okadylmagy ýakyn ýyllarda global bilimiň, dynç alşyň we aragatnaşygyň nähili üýtgejekdigini görkezdi. Indi biz xAI-iň düzüminde dünýäde iň uly Colossus klasterinde işimizi dowam etdireris” – diýip, startapy esaslandyryjylaryň biri Aakaş Sastri belledi.
Bary-ýogy birnäçe sekuntda ýokary derejeli wideolary döretmäge mümkinçilik berýän Hotshot tehnologiýasy eýýäm wençur gaznalaryndan maýa goýumlary özüne çekdi.
Adaty wideo önümçiligi montaž, animasiýa hem grafika bilen işlemek başarnyklaryny talap edýän gymmat we tehniki taýdan çylşyrymly iş bolmagynda galýar. Hotshot diňe tekst beýanynyň üsti bilen wideo döretmek arkaly bu meseläniň çözgüdini tapdy. Bu hem işewürlik, bilim platformalary we uly býujeti bolmadyk garaşsyz awtorlar üçin mazmun döretmäge ýol açdy.
Hotshot-yň xAI ekoulgamyna goşulmagy Mask tarapyndan ýanwar aýynda anons edilen “Grok Video” guralynyň ösdürilmegini çaltlaşdyrar hem-de Sora we Veo 2 ýaly bäsdeşleriň arasynda uly öňegidişlik bolup biler.
14-nji martdan Hotshot öz platformasynda täze wideo döretmegi bes etdi. Ulanyjylar arhiw işleri 30-njy marta çenli ýükläp alyp biler, şondan soň hyzmat garaşsyz işini bes eder. Tehnologiýanyň mundan beýläkki işi xAI-iň çäklerinde bolup geçer.
