Italiýanyň günortasyndaky gadymy Penne şäheri 1 ýewrodan satlyk jaý barada bildiriş etdi. Bu barada CNN habar berýär.
Ilaty 1200 töweregi bolan bu şäher ozal hem arzan jaýlary hödürläpdi, şolardan altysy, esasan, italýanlara satyldy. Häkim Jilberto Petruççi ilatly merkezi janlandyryp biljek täze adamlary tapmak isleýändigini aýtdy.
“Şäherde 40-dan gowrak boş jaý täze eýelerini gözleýär we olaryň ählisi taryhy merkezde ýerleşýär, bu ýer onlarça ýyl mundan ozal maşgalalar göçüp başlaly bäri gowşap başlady” – diýip, ol CNN Travel bilen söhbetdeşlikde aýtdy.
Satyn alyş düzgünleri hem birneme gowşadyldy. Şeýle shemalary ulanýan beýleki şäherlerde, adatça, salgyt talap edilýär we ol işler tamamlanandan soň gaýtarylyp berilýär.
“Ýeke-täk talap – satyn alyjylar üç ýylyň dowamynda bu jaýlary gaýtadan dikeltmek borjuny öz üstüne almaly, ýöne biz işe başlamak üçin başlangyç töleg kepillendirmelerini talap etmeýäris. Biz, hakykatdanam, gadymy sebiti janlandyrmaga gelenleri höweslendirmek we goldamak isleýäris” – diýip, şäher häkimi belledi.
Şeýle-de, Penne abatlaýyş işlerinde “maslahat bermek” we “goldamak” boýunça-da kömek hödürleýär.
Şäher neolit döwrüniň ortalaryndan bäri ilatly we Abrusso sebitinde güýç merkezi bolupdy. Soňky döwürde Penne syýahatçylar üçin meşhur ýere öwrüldi.
Belläp geçsek, soňky birnäçe ýylda italýan şäherleriniň köpüsi jaýlary satyn almak boýunça şeýle tekliplere ýüzlenýär. Sambuka-di-Sisiliýada şeýle baha bilen jaýlar 2019-njy we 2021-nji ýyllarda satyldy. 2022-nji ýylda Airbnb obada “1 ýewrodan jaý” aljak adamy tapmak üçin bäsleşik geçirip başlady.
