“Il Foglio” italýan gazeti doly derejede emeli aň tarapyndan döredilen dünýäde ilkinji gazet sanyny çykardy. Tekstlerden başlap, sözbaşylara çenli – ählisi tehnologiýanyň “eliniň” işi diýip, The Guardian habar berýär.
“Hemmesini EA etdi: tekstler, sözbaşylar, sitatalar – hatda kinaýa hem goşdy” – diýip, redaksiýada bellenildi. Žurnalistler diňe sorag bermek we jogaplary barlamak bilen prosesi ugrukdyrdy.
Redaktor Klaudio Çereza bu taslamany tehnologiýalaryň işi we durmuşy nähili üýtgedýändigini görkezýän tejribe diýip atlandyrdy. Dört sahypalyk gazet sany eýýäm satuwa çykdy we “Il Foglio” şeýle gazeti çykarmagy dowam etdirmegi meýilleşdirýär, ýöne olar adaty gazetiň ornuny çalyşmaz.
Neşiriň mazmuny dürlüçe boldy: EA makalalarda Italiýanyň häzirki syýasy hereketleri barada pikir ýöredýär, dünýädäki geosyýasy ýagdaýy seljerýär, italýan ykdysadyýetini, salgyt özgertmelerini öwrenýär, şeýle-de 750 müň işgär üçin zähmet haklaryny ýokarlandyrmak hem-de ýewropalylaryň näme üçin çynlakaý gatnaşyklardan gaça durýandygy barada sütün bar.
Tekstler düşnükli, tertipli we grammatik ýalňyşsyz boldy diýip, The Guardian belleýär.
