ÝUNESKO-nyň Pariždäki ştab-kwartirasynda, “Segur” zalynda Nowruz baýramyna bagyşlanan çäre geçirildi.
Çäre 13 ýurduň – Türkmenistanyň, Azerbaýjanyň, Owganystanyň, Eýranyň, Yragyň, Gazagystanyň, Gyrgyzystanyň, Täjigistanyň, Türkiýäniň, Özbegistanyň, Hindistanyň, Mongoliýanyň we Pakistanyň hemişelik wekilhanalary tarapyndan gurnaldy.
Dabaranyň dowamynda guramaçy ýurtlaryň milli aýdym-saz eserleri we tanslary ýerine ýetirildi, milli lybaslar we tagamlar görkezildi.
Çärä gatnaşan ÝUNESKO-nyň baş direktory Odri Azule gatnaşyjylary bu baýram bilen gutlap, Nowruzyň täzelenmegi, umydy we tebigatyň janlanmagyny alamatlandyrýandygyny belledi. Çykyşdan soň, ol baýramçylyk saçaklary, şol sanda türkmen milli tagamlary bilen tanyşdy.
Myhmanlara türkmen halkynyň elde dokalan halylary, milli lybaslary, şaý-sepleri, ýadygärlik sowgatlary, şeýle-de Türkmenistanyň Prezidenti Serdar Berdimuhamedowyň we türkmen halkynyň Milli Lideri Gurbanguly Berdimuhamedowyň kitaplary hödürlendi.
Çäräniň medeni meýilnamasynda guramaçy ýurtlardan milli aýdym-saz we tans çykyşlary görkezildi, uly ekranlarda bolsa her ýurtda Nowruz baýramyny bellemegiň däpleri, şol sanda Türkmenistanda Milli bahar baýramyny bellemegiň baý däpleri barada wideolar görkezildi.
Nowruz 2009-njy ýylda ÝUNESKO-nyň maddy däl medeni mirasynyň sanawyna girizildi.
