16-njy martda Katar Döwletiniň Emiri Şeýh Tamim bin Hamad Al Tani Türkmenistanyň wise-premýeri, daşary işler ministri Raşid Meredowyň ýolbaşçylygyndaky wekiliýeti kabul etdi. Bu barada Türkmenistanyň DIM-niň metbugat gullugy habar berýär.
Duşuşygyň dowamynda daşary syýasat edarasynyň ýolbaçysy Prezident Serdar Berdimuhamedowyň we Türkmenistanyň Halk Maslahatynyň Başlygy Gurbanguly Berdimuhamedowyň Kataryň Emiriniň adyna ýollan mähirli salamyny we iň gowy arzuwlaryny ýetirdi.
Kataryň Emiri Şeýh Tamim bin Hamad Al Tani gowy arzuwlary üçin türkmen tarapyna minnetdarlyk bildirip, öz gezeginde Türkmenistanyň ýolbaşçylaryna mukaddes Oraza aýynda tutulýan orazalaryň we ýagşy doga-dilegleriň Beýik Biribaryň dergähinde kabul bolmagyny arzuwlap, iň mähirli salamyny ýetirmegini haýyş etdi.
Konstruktiw ikitaraplaýyn hyzmatdaşlyk bilen bir hatarda köptaraplaýyn formatda, ilkinji nobatda, Birleşen Milletler Guramasynyň çägindäki hyzmatdaşlygyň netijeliligi aýratyn bellenildi. Hususan-da, ýurdumyzyň Bitaraplygynyň 30 ýyllygy mynasybetli 2025-nji ýylyň 12-nji dekabrynda Aşgabatda Parahatçylygyň we ynanyşmagyň halkara forumynyň geçiriljekdigi aýdyldy bu halkara foruma we baýramçylyk çärelerine Katar tarapy gatnaşmaga çagyryldy.
