16-njy martda wise-premýer, daşary işler ministri R.Meredow Katar Döwletine iş saparynyň çäklerinde bu ýurduň Premýer-ministri, daşary işler ministri Şeýh Mohammed bin Abdulrahman Al Tani bilen duşuşdy diýip, türkmen daşary syýasat edarasy habar berýär.
Duşuşygyň başynda taraplar syýasy diplomatik, söwda-ykdysady hem-de medeni-ynsanperwer ugurlarynda ikitaraplaýyn gatnaşyklary giňeltmek boýunça meseleleri ara alyp maslahatlaşdylar.
Şeýle hem söhbetdeşligiň barşynda taraplar energetika, maýa goýum we ulag ugurlary türkmen-katar gatnaşyklarynda geljegi uly ugurlara öwrüljekdigini nygtadylar.
Mundan başga-da, sebit howpsuzlygy we ösüşiň ileri tutulýan meseleleri, şeýle hem Owganystandaky durmuş-ykdysady ýagdaýlar barada düýpli pikir alşyldy. Hususan-da, Türkmenistan - Owganystan - Pakistan - Hindistan (TOPH) transmilli gaz geçirijisiniň taslamasynyň durmuşa geçirilmeginde möhüm tapgyr bolan Owganystanyň çägindäki Serhetabat-Hyrat böleginde gurluşyk işleriniň gidişi barada aýdyldy. Katar tarapy bu ugurda alnyp barylýan hyzmatdaşlyga ýokary baha berdi.
Şeýle hem taraplar halkara guramalaryň çäklerinde alnyp barylýan hyzmatdaşlygyň konstruktiw häsiýetini bellediler.
Şunuň bilen baglylykda, 2025-nji ýylyň 12-nji dekabrynda ýurdumyzda geçiriljek Halkara parahatçylyk we ynanyşmak ýylynyň wekilçilikli Forumy barada aýdylyp, Katar tarapy bu ýokary derejeli foruma gatnaşmaklyga çagyryldy.
