SpaceX 13 sagadyň içinde üç orbital uçuryşyny amala aşyryp, rekord goýdy.
Uçuşlaryň çäklerinde kompaniýa Halkara kosmos stansiýasyna (HKS) dört astronawt iberdi, Transporter-13 maksatnamasynyň çäklerinde orbita 74 hemra, şeýle-de 23 Starlink enjamyny çykardy, şolardan 13-üsi öýjükli ulgama göni birikdiriş tehnologiýasy (Direct-to-Cell) bilen üpjün edilendir.
Birinji Crew-10 missiýasy boldy. Ol 15-nji martda Aşgabat wagty bilen 04:03-de NASA-nyň Floridadaky Kennedi kosmos merkeziniň 39A kosmodromyndan uçuryldy. Gäminiň ekipažy öňki ekipažyň ornuny çalşyp, stansiýada alty aý töweregi bolar we ylmy tejribeleri hem kosmiki toplumyň tehniki hyzmatyny geçirer.
Şeýle-de, şol gün irden SpaceX Wandenberg (Kaliforniýa) bazasyndan 74 hemra uçurdy. Bu missiýanyň dowamynda Falcon 9-yň birinji basgançagy programmanyň tutuş taryhynda 400-nji üstünlikli gonuşyny amala aşyrdy.
Eýýäm agşam Kanaweral burnundan kompaniýa tarapyndan 23 Starlink hemrasy uçuryldy. Olar kompaniýanyň hemralar toparyny giňeltmek üçin niýetlenýär. Soňky uçuş Falcon 9-yň hut şu birinji basgançagynyň eýýäm 18-nji gezek üstünlikli gonandygy sebäpli bellärliklidir. Ol SpaceX-iň köp gezeklik kosmiki uçuryşlarynyň ýokary derejede ygtybarlydygyny görkezdi.
Bellenilişi ýaly, SpaceX, takmynan, 8 100 Starlink hemrasyny orbita çykardy, olardan 7 061 sanysy iş ýagdaýynda. 2025-nji ýylda kompaniýa eýýäm 31 uçuryşy amala aşyrdy, olaryň üçden iki bölegi Starlink missiýalary bilen baglanyşyklydyr.
