Apple kompaniýasy emeli aňly täzelenen Siri kömekçisiniň çykarylyşynyň yza süýşürilendigini resmi taýdan tassyklady. Işläp düzmeklik, garaşylandan, has köp wagt talap edýär.
Başda bu täzelenmäniň iOS 18.4 bilen bilelikde aprel aýynda çykarylmagyna garaşylýardy.
«Siri ulanyjylarymyza zerur zatlary tapmaga we wezipeleri çalt ýerine ýetirmäge ýardam berýär. Geçen alty aýyň dowamynda biz ony has geplemsek etdik, Siri bilen ýazyşmak mümkinçiligini goşduk, Apple önümleri hakyndaky bilimlerini giňeltdik we ChatGPT bilen integrasiýa etdik. Emma şahsylaşdyrylan Siri-niň ulanyjylaryň şahsy kontekstini göz öňünde tutup, programmalarda hereketleri ýerine ýetirip bilmegi üçin has köp wagt gerek. Geljek ýyl çykmagyna garaşýarys» — diýip, Apple-yň metbugat sekretary Žaklin Roý «Daring Fireball» çeşmesine aýtdy.
Täzelenen Siri-niň gijikdirilmegi sebäpli, kompaniýa Apple Smart Home Hub-yň çykarylmagyny hem yza süýşürdi diýip, «Bloomberg» habar berýär. Ilkibaşda bu enjamyň mart aýynda tanyşdyrylmagyna garaşylýardy, emma onuň işlemegi täze Siri bilen baglanyşykly.
Mark Gurmanyň maglumatlaryna görä, Apple bu enjamy eýýämden öz işgärleriniň arasynda synagdan geçirýär. Hub kiçi ekrany bolan iPad-e meňzeş bolar we ulanyjylara öý enjamlaryny dolandyrmaga, wideo aragatnaşyk saklamaga hem-de beýleki funksiýalardan peýdalanmaga mümkinçilik berer. Onuň A18 çibi bilen enjamlaşdyrylmagyna garaşylýar.
