Pekiniň kwant informatikasy akademiýasynyň alymlary öňegidişlik gazandy. Olara ýagtylyk maglumatyny 4035 sekunt, ýagny 67 minutdan gowrak wagt saklamak başartdy. Bu rekord kwant maglumatlary işlemekde täze üstünliklere tarap ýol açýar.
Esasy mesele ýokary tizlik bilen hereket edýän fotonlary tutmagyň we bellige almagyň örän kyn bolmagynda jemlenýär. Öň alymlar foton kristallaryny we fotowoltaiki ulgamlary ulanýardy, ýöne olar gymmat bolup, pes netije berýärdi.
Topar kremniý karbidinden monokristal plýonkanyň kömegi bilen ýagtylygy ses tolkunlaryna öwrüp, bu meseläni çözmegiň ýoluny tapdy. Fotonlaryň bu material bilen özara täsiri ýagtylyk energiýasynyň akustiki tolkunlara öwrülmegine getirýär, bu hem saklanyş prosesini ep-esli aňsatlaşdyrýar.
Saýlanan material durnuklylygy we ýitginiň az bolmagy bilen tapawutlanýar, bu bolsa maglumatlary alýumin ýa-da kremniý nitridi ýaly öňki nusgalardan has uzak saklamaga mümkinçilik berýär.
Plýonka nola ýakyn temperaturalarda hem işleýär.
Tehnologiýa çylşyrymly hasaplamalary adaty kompýuterlerden çalt ýerine ýetirmäge ukyply bolan kuwwatly kwant prosessorlaryny döretmegi tizleşdirmäge wada berýär.
Alymlar saklanyş wagtyny has uzaltmak, maglumatlaryň dykyzlygyny ýokarlandyrmak we tehnologiýany beýleki kwant ulgamlary bilen birleşdirmek işlerini dowam etdirmegi meýilleşdirýär.
