BYD konserni uzaldylan kaşaň wnedorožnigi bolan Yangwang U8L-i mahabatlandyrmagyň çäklerinde, beýleki zatlar bilen birlikde ulagyň berkligini we howpsuzlygyny görkezýän kreatiw wideony çykardy. Munuň üçin adaty bolmadyk usul oýlap tapdylar: kuzowyň berkligini onuň üstüne agajy ýykmak arkaly, ramanyň berkdigini bolsa 12 tonnalyk awtobus arkaly synagdan geçirdiler.
Wideonyň başynda sürüjiniň öňdäki direginiň töweregine, kuzowyň üstüne uly, hakyky palma agajyny ýykýarlar. Synag üç tapgyrda geçirilýär, agajyň ýykylýan aralygy (3, 4 we 5 metr) tapgyrlaýyn artdyrylýar we zarba kem-kemden güýçlendirilýär. Göze görnüp duran ýeke-täk zeper - bu şeýle zarba üçin ujypsyz hasaplanýan ýemşik. Sürüjiniň gapysy üç synanyşykdan soň hem kynçylyksyz açylyp-ýapylýar.
Wideonyň 11-nji minudynyň ahyrynda başga bir adaty bolmadyk synag görkezilýär. Wnedorožnigiň ramasynyň ortasyna, çekiş batareýasynyň oturdylan ýerine 12 tonnalyk awtobusy asýarlar. Bu ýüküň astynda ýönekeý göz bilen görnüp duran hiç hili deformasiýa döremeýär.
Wideonyň galan bölekleri modeliň beýleki artykmaçlyklaryna ünsi çekýär. Yangwang U8L özüniň dar meýdançadaky duralga (parkowka) mümkinçiliklerini, özboluşly daşky we içki yşyklandyryşyny, şeýle hem sürüjä kömek ulgamlarynyň işleýşini we köp sanly amatlylyk aýratynlyklaryny görkezýär.
Wnedorožnik aprel aýynda Şanhaý awtoulag sergisinde tanyşdyryldy. Ulagyň uzynlygy 5400 millimetr, teker arasyndaky aralyk 3250 millimetr. Güýç ulgamy dört elektrik hereketlendirijini we içinden ýandyrylýan hereketlendirijisini birleşdirip, umumy kuwwaty 1197 at güýjüni (AG) we 1280 Nm tork öndürýär. Ulag "ýüzmek" we "tank öwrümi" režimleri bilen enjamlaşdyrylan.
