Focus2Move synçy kompaniýasy 2025-nji ýylyň netijeleri boýunça 61 ýurtda iň köp satylan awtoulag markalarynyň sanawyny çap etdi. Garaşylyşy ýaly, dünýä bazarynyň lideri bir wagtyň özünde 25 ýurtda birinji orny eýelän Toyota boldy.
Gözleg işleri Demirgazyk Amerikanyň, Ýewropanyň, Ýakyn Gündogaryň, Aziýanyň we Afrikanyň bazarlaryny öz içine alýar. Argentina, Ýaponiýa we Filippinler üçin 2024-nji ýylyň maglumatlary ulanyldy. Toyota kompaniýasy ABŞ-nyň, Ýaponiýanyň, Saud Arabystanynyň we Günorta Afrikanyň bazarlarynda öňdeligini saklap galdy. Synçylar munuň sebäbini markanyň ygtybarly we tygşytly awtoulag hökmündäki abraýy, şeýle hem ösen dilerlik ulgamy bilen baglanyşdyrýarlar.
Ýewropada bolsa sebit öndürijileri güýçli öňdebaryjylygy saklamagy dowam etdirýärler. Volkswagen Germaniýada, Awstriýada, Daniýada, Şweýsariýada we Beýik Britaniýada iň köp satylýan marka boldy. Fransiýada Renault, Italiýada Fiat, Russiýada Lada, Çehiýada bolsa Škoda öňe saýlandy.
Hytaýyň içki bazarynda elektromobilleriň meşhurlygynyň artmagy bilen BYD kompaniýasy birinji orny eýeledi. Hindistanda Maruti, Wýetnamda VinFast liderligini saklaýar. Eýranda iň iri marka Iran Khodro, Nigeriýada bolsa Innoson boldy.
Gözlegiň awtorlary köp ýurtlaryň, hususan döwlet goldawy arkaly öz milli öndürijilerini goldamagy dowam etdirýändiklerini-de belleýärler.
