Aşgabatda «Toyota» awtoulaglaryny satyş we satuwdan soň hyzmat etmek boýunça döwrebap Merkeziň gurluşygyna girişildi. Türkmenistanyň Ýaponiýanyň awtoulag öndürijisi bilen hyzmatdaşlygyny berkitmäge niýetlenen bu toplumy 2027-nji ýylyň dekabr aýynda açmak meýilleşdirilýär.
Taslamanyň buýrujysy «Beýik Ýüpek Ýoly» kompaniýasy bolup, ol «Toyota Central Asia» bilen ýakyn hyzmatdaşlykda, bu işi Ýaponiýanyň maýa goýumlaryny çekmek bilen amala aşyrýar. Kompaniýa döwletiň ählitaraplaýyn goldawy netijesinde halkara talaplara laýyk gelýän giň gerimli taslamany durmuşa geçirýär.
2,79 gektar meýdany eýelejek geljekki toplum G.Kuliýew (Obýezdnoý) köçesiniň ugrunda ýerleşip, satuwy, hyzmaty we ätiýaç şaýlarynyň ammarlaryny birleşdirýän doly derejeli 3S (Sales, Service, Spare parts) formatly diler merkezi hökmünde taslanyldy. Iki gatly binada döwrebap şou-rum (awto sergi zaly) we doly derejeli hyzmat merkezi ýerleşer.
Binanyň arhitekturasy we meýilnamasy «Toyota-nyň» global standartlaryna laýyklykda işlenip düzüldi. Hyzmat merkezi bir wagtda sekiz sany awtoulaga hyzmat edip biler we ähli görnüşli, ýagny meýilnamalaýyn gözden geçirişden we diagnostikadan başlap, kuzowy bejermäge we elektron ulgamlary sazlamaga çenli işleri ýerine ýetirer.
Gurluşygyň taslamalaşdyrylmagy we durmuşa geçirilmegi «Toyota Central Asia-nyň» hemişelik gözegçiligi astynda amala aşyrylýar. Ähli inženerçilik we wizual çözgütler Ýaponiýanyň awto-ägirdiniň korporatiw bölümleri bilen ylalaşylýar, taslamanyň durmuşa geçirilişi baradaky hasabatlar bolsa «Toyota-nyň» sebit wekilhanasyna yzygiderli iberilýär.
