27-nji noýabrda Baýkonur kosmodromyndan kosmonawtlar Kud-Swerçkow, Mikaýew we astronawt Lu Uilýams bilen “Soýuz MS-28” kosmos gämisi HKS-e ugrady. Uçuşdan soň birinji basgançagyň reaktiw akymynyň № 31 uçuş meýdançasyny zaýalandygy belli boldy diýip, The Insider neşiri habar berýär.
Reaktiw akymy uçuş meýdançasyna düşüp, metal böleklere we hünärmenleriň raketany uçuşa taýýarlamak üçin ulanýan hyzmat ediş kabinasyna zyýan ýetiripdir. Şol sebäpli uçuş toplumyndan raketalary uçurmagy togtatmaly bolýar, bu hem HKS-iň iş maksatnamasyna düýpli täsir eder.
№31 meýdançasy Baýkonurda ekipažly “Soýuz” we ýükli “Progress” gämileriniň uçurylýan ýeke-täk meýdançasydyr. Bu uçuş toplumynyň 1961-nji ýyldan bäri dowam edýän baý kosmos taryhy bar. Şondan bäri bu ýerden 400-den gowrak P-7 we “Soýuz” raketalary uçuryldy. 2020-nji ýyldan bäri HKS-iň rus bölegini üpjün etmek işini hut № 31 meýdançasy ýerine ýetirýärdi.
“Soýuz” raketalary üçin laýyk gelýän başga uçuş meýdançalary dürli, şol sanda tehniki we geografik sebäplere görä ulanyp bilinmeýär.
«Roskosmos» meýdançany abatlamak üçin ähli zerur ätiýaçlyk elementleriniň bardygyny, ýöne dikeltmegiň möhletiniň entek belli däldigini aýtdy. 19-njy dekabra meýilleşdirilen «Progress» ýük gämisiniň uçuşy, ähtimal, yza süýşürilip bilner. Üpjünçiligiň bir bölegini amerikan we ýapon gämileri üpjün edip biler, ýöne HKS-iň orbitasyny sazlamak funksiýalaryny, adatça, Russiýanyň kosmos gämileri ýerine ýetirýär.
