2026-njy ýylda Russiýanyň Hökümetiniň Başlygy Mihail Mişustin we Russiýanyň Prezidenti Wladimir Putin Türkmenistana sapar bilen geler. Bu barada Russiýanyň ilçisi Iwan Wolynkin «Neýtralnyý Turkmenistan» gazetinde 8-nji aprelde çap edilen makalasynda habar berdi.
Diplomatyň aýtmagyna görä, Mihail Mişustiniň sapary 22-nji maýa meýilleşdirilýär. Ol Aşgabatda geçiriljek Garaşsyz Döwletleriň Arkalaşygynyň (GDA) Hökümet Baştutanlarynyň Geňeşiniň mejlisine gatnaşar. Duşuşykda ykdysady hyzmatdaşlyk, sanlylaşdyrma we ulag ugurlaryny ösdürmek meselelerini maslahatlaşmak göz önünde tutulýar.
Wladimir Putiniň saparyna bolsa 9-njy oktýabrda Türkmenistanda geçiriljek GDA-nyň döwlet Baştutanlarynyň Geňeşiniň mejlisiniň çäklerinde garaşylýar.
Bu saparlar Türkmenistanyň GDA-da başlyklyk edýän döwründe amala aşyrylar. Ýurt bu wezipäni Täjigistandan kabul edip alypdy.
