Prezident Serdar Berdimuhamedow Indoneziýa Respublikasynyň Prezidenti Prabowo Subianta ýurduň Sumatra welaýatynda güýçli ýagyşlar sebäpli emele gelen suw joşgunlarynyň köp sanly adam pidalaryna, şikes ýetmelere hem-de weýrançylyklara getirendigi zerarly gynanç hatyny iberdi.
Döwlet Baştutany şu kynçylykly pursatda gurban bolanlaryň dogan-garyndaşlaryna we ýakynlaryna ýürekden gynanjyny hem-de medet beriji sözlerini, ejir çekenlere bolsa tiz wagtda sagalmaklary baradaky dileglerini beýan etdi.
Indoneziýanyň häkimiýetleriniň berýän maglumatlaryna görä, suw joşmalaryndan we opurylmalardan pida bolanlaryň sany azyndan 631 adama ýetdi we 472 ýiten adamy gözlemek işleri dowam edýär.
Takmynan, bir milliona golaý adam öz öýlerini terk etmäge mejbur boldy we 3500 jaý uly zeper ýetdi.
Suw joşmalary we opurylmalar esasan ýagşyň aýratyn güýçli bolan Demirgazyk Sumatra, Atjeh we Günbatar Sumatra welaýatlaryna täsir etdi.
