OpenAI we Oracle kompaniýalary Stargate taslamasynyň çäginde Tehasda maglumat merkeziniň gurluşygyna başlady. Öňümizdäki aýlarda Nvidia GB200 çipleriniň ilkinji 16 müň sanysy oturdylar, 2026-njy ýyla çenli bolsa bu san 64 müňe ýetiriler diýip, «Bloomberg» habar berýär.
Ýanwar aýynda OpenAI, SoftBank Group we Oracle başlangyç maýa goýum hökmünde 100 milliard dollar bölüp berýändiklerini yglan edipdi. Olaryň bu mukdary indiki dört ýylyň dowamynda 500 milliard dollara çenli artdyrmak mümkinçilikleri hem bar.
OpenAI maglumat merkezini dizaýn etmek bilen, şeýle-de üpjünçilik bilen meşgullansa, Oracle superkompýuterleri satyn almak we işletmek işlerini öz üstüne alýar. Emma häzirlikçe ne Oracle, ne-de Nvidia bu mesele barada düşündiriş bermedi.
Stargate taslamasy emeli aň (EA) modellerini türgenleşdirmek we giňeltmek üçin zerur bolan, iň täze Nvidia çipleriniň önümçiligini artdyrmak ugrunda tehnologiýa kompaniýalarynyň arasyndaky giň gerimli bäsdeşligiň bir bölegi boldy.
Beýleki kompaniýalar hem EA infrastrukturasyna maýa goýýar. Mysal üçin, Ilon Maskyň xAI kompaniýasy Memfisde EA serwerlerini döretmek üçin, Dell Technologies bilen 5 milliard dollarlyk şertnama baglaşdy. Meta Platforms bolsa Nvidia H100 çipleriniň sanyny 600 müňe ýetirmek üçin has uly hasaplaýyş kuwwatyny döretmegi meýilleşdirýär.
GB200 çipleriniň ilkinji tapgyrynyň bahasy birnäçe milliard dollara barabar bolar. Nvidia kompaniýasy çipleriň bahasyny anyk aýdanok, emma kompaniýanyň baş direktorynyň öňki beýanyna görä, B200 çipleriniň bahasy 30 müň bilen 40 müň dollar aralygynda bolmaly.
OpenAI we SoftBank nobatdaky maglumat merkezleri üçin, Pensilwaniýa we Wiskonsin ýaly beýleki sebitleri hem göz öňünde tutýarlar.
