19-njy martda Aşgabatda “Halkara parahatçylyk we ynanyşmak ýyly: Durnukly ösüşi üpjün etmekde sebitara ykdysady hyzmatdaşlygyň orny» atly halkara maslahatyny geçirmäge taýýarlyk görülýär. Bu barada 7-nji martda Hökümet mejlisiniň barşynda wise-premýer, daşary işler ministri R.Meredow aýtdy.
Bellenilişi ýaly, bu wekilçilikli foruma daşary ýurtlaryň döwlet düzümleriniň we iri kompaniýalarynyň, halkara guramalarynyň we maliýe edaralarynyň, şeýle hem ýurdumyzda işleýän diplomatik wekilhanalaryň ýolbaşçylary gatnaşar.
Bu çäräniň maksatnamasyna laýyklykda, «Merkezi we Günorta Aziýada energetika, ulag we infrastruktura taslamalaryň geosyýasy we geoykdysady ähmiýeti», «Türkmenistan-Owganystan-Pakistan-Hindistan gaz geçirijisi: ykdysady, guramaçylyk we hukuk meseleleri», «Türkmenistan-Owganystan-Pakistan elektrik geçirijisiniň gurluşygynyň halkara ykdysady hyzmatdaşlygy pugtalandyrmakda orny we ähmiýeti», «Merkezi we Günorta Aziýa sebitlerinde ulag arabaglanyşygy: ösüşiň taslamalary» hem-de «Maliýe institutlarynyň Merkezi we Günorta Aziýadaky ykdysady taslamalaryň durmuşa geçirilmegine gatnaşmaklary» atly mowzuklaýyn mejlisleriň 5-sini geçirmek meýilleşdirilýär.
Mundan başga-da, maslahatyň çäklerinde dürli formatdaky ikitaraplaýyn duşuşyklary geçirmek göz öňünde tutulýar.
Prezident Serdar Berdimuhamedow wise-premýer, daşary işler ministrine durnukly ösüşi üpjün etmekde sebitara ykdysady hyzmatdaşlygy ösdürmäge ýardam berjek bu halkara maslahatyna gowy taýýarlyk görmegi we ýokary derejede geçirmegi tabşyrdy.
