Hytaýly alymlar ýaşy 125 million ýyl geçen gadymy içýanyň galyndylaryny tapdylar. Bu ýurtda mezozoý döwrüniň ilkinji açyşy we paleontologiýa üçin möhüm ädimdir diýip, “Sinhua” habarlar gullugy habar berýär.
Galyndy Hytaýyň demirgazyk-gündogaryndaky Lýaonin welaýatyndan tapyldy. Bu barlagy Hytaýyň Ylymlar akademiýasynyň ýanyndaky Nankin geologiýa we paleontologiýa institutynyň alymlary geçirdi. Täze görnüşe tapylan ýeri bolan Žehol biotasynyň hormatyna Jeholia longchengi diýen at dakyldy.
Bu biota irki hek asyrynyň iň gowy öwrenilen yklym ulgamlaryndan biridir. Ol ýelekli dinozawrlaryň we ösümlikleriň gowy saklanyp galan galyndylary bilen meşhurdyr we XX asyryň iň möhüm paleontologiki açyşlaryndan biri hasaplanýar.
Jeholia longchengi takmynan 10 sm uzynlykdaky gaty uly içýan bolup, bedeninde uzyn aýaklary, inçe pedipalplary, bäşburç döş kapasasy we uzyn neşderi bolupdyr. Ol iýmit zynjyrynda orta orny eýeleýän, mör-möjekleri we möýleri awlaýan mezoýyrtyjydyr.
Barlagçy Huan Diin: "Eger ol häzirki zaman gurşawyna ýerleşdirilse, köp haýwanlar üçin ýyrtyja öwrülip, hatda ownuk oňurgaly haýwanlary hem awlap bilerdi" -diýip belleýär.
Bu açyşdan öň Hytaýda diňe üç sany içýanyň galyndylary tapylypdy, ýöne olar beýleki welaýatlardan, ýagny Şandundan, Hubeýden we Içki Mongoliýadan tapylypdy.
