22-nji fewralda Arkadag şäherine iş saparyny barşynda türkmen halkynyň Milli Lideri Gurbanguly Berdimuhamedow şäheriň Aragatnaşyk müdirliginde demir ýol we awtomobil menzilleriniň şekil taslamalary bilen tanyşdy.
Gün panelleri menzilleriň dolandyryş düzümlerini we yşyklandyryş ulgamyny zerur bolan elektrik energiýasy bilen bökdençsiz üpjün eder. Gün panelleri Aziýa ösüş bankynyň grant serişdeleriniň hasabyna gurlar. Täze tehnologiýalary ornaşdyrmak işleri “Türkmenaragatnaşyk” agentliginiň hünärmenleri bilen bilelikde alnyp barlar.
Arkadag şäheriniň demir ýol menzili häzirki zamanyň talaplaryna we dünýäniň ösen tejribesine esaslanyp, bina ediler. Şunda toplumyň ähli ulgamyny dolandyrmak, onuň işine gözegçilik etmek häzirki zaman täzeçil tehnologiýalary esasynda amala aşyrylar.
Şeýle hem Arkadag şäheriniň täze awtomobil menziliniň binalarynyň gurluşygy, onuň daşky we içki bezeg işleri häzirki zaman binagärlik talaplaryna laýyklykda ýerine ýetiriler. Şol bir wagtyň özünde, toplumyň merkezi binasynyň özboluşly görnüşe eýe bolmagyna, onuň bezeg aýratynlyklaryna we ýolagçylar üçin amatly şertleriň döredilmegine zerur üns berler.
Gurbanguly Berdimuhamedow binalarda oturdyljak Gün panelleriniň derejesine, olaryň häzirki zaman talaplaryna laýyk gelmegine we ýokary kuwwatlyga eýe bolmagyna möhüm ähmiýet berilmelidigini belledi we bu babatda ylmyň gazananlaryny, dünýäniň ösen tejribesiniň esasy ugur edinilmelidigine ünsi çekdi.
