Türkmenistanyň Saglygy goraýyş we derman senagaty ministrliginiň, “Türkmenaragatnaşyk” agentliginiň hem-de Türkmenistanyň Oguz han adyndaky Inžener-tehnologiýalar uniwersitetiniň wekillerinden ybarat bolan topar 2025-nji ýylyň 3-15-nji fewralynda Germaniýa Federatiw Respublikasynyň hassahanalarynda we klinikalarynda iş sapary bilen boldular. Bu barada Türkmenistanyň bilim ministrliginiň saýtynda habar berilýär.
Bellenilişi ýaly, saparyň maksady – merkezde seljeriş-intellektual bölüminiň işini ýola goýmak babatda zerur bolan internet, sanly ulgam, maglumat howpsuzlygy, emeli aň we kompýuter programmalarynyň üpjünçiligini ýerinde öwrenmek.
Iş saparynyň dowamynda wekiller Fraýbrug uniwersitet hassahanasyna, RWTH Ahen uniwersitet klinikasyna, Heidelberg uniwersitet hassahanasyna, Göttingen hassahanasyna, Lýudwig Maksimillian adyndaky Mýunhen uniwersitetiniň Groshadern klinikasyna, Augsburg uniwersitet hassahanasyna we Fürstenfeldbruk hassahanalaryna bardylar.
Türkmen wekiliýetiniň agzalary hassahanalaryň lukmançylyk işgärleri, IT we intellektual-seljeriş bölümleriniň hünärmenleri bilen duşuşyp, sanly lukmançylyk boýunça soraglary ara alnyp maslahatlaşdylar. Şeýle hem olaryň hassahana işini sanlylaşdyrmak, emeli aň tehnologiýalaryny ornaşdyrmak we ulanmak, IT bölümleriň işini guramak babatynda tejribelerini öwrendiler.
Bellenilişi ýaly, bu iş sapary Türkmenistanyň Halk Maslahatynyň başlygy Gurbanguly Berdimuhamedowyň tabşyryklaryndan ugur alnyp guraldy.
