Türkmenistanyň daşary işler ministri Raşid Meredow Birleşen Milletler Guramasynyň Adam hukuklary boýunça Ýokary komissarynyň wekiliýeti bilen duşuşyk geçirdi. Duşuşyk 18-nji fewralda Türkmenistanyň Diplomatik işgärleriniň güni mynasybetli geçirilen “Halkara parahatçylyk we ynanyşmak ýyly: halkara gatnaşyklary berkitmekde diplomatiýanyň orny” atly halkara ylmy maslahatyň çäginde guraldy.
Türkmenistanyň DIM-niň metbugat gullugynyň habar bermegine görä, duşuşygyň dowamynda Türkmenistanyň BMG we onuň Adam hukuklary boýunça Ýokary komissarynyň müdirligi bilen alyp barýan ynsanperwer hyzmatdaşlygyna syn berildi.
Adam hukuklary babatynda milli meýilnamalary we maksatnamalary işläp düzmek, Türkmenistanda demokratik institutlary kämilleşdirmek we halkara şertnamalaryna goşulmak boýunça bilelikdäki konsultatiw işleriň ähmiýeti nygtaldy.
Taraplar hyzmatdaşlygyň häzirki ýagdaýy bilen baglanyşykly meseleleri we ýakyn wagtda geçiriljek çäreleri ara alyp maslahatlaşdylar.
