ChatGPT-niň giňden ýaýramagy bilen onuň sarp edýän energiýasynyň ýokarydygy barada howsalalar peýda bolup başlady. Ýöne Epoch AI-iň gözlegi bu mifi ret etdi. Ylmy gözlegçi Joşua Ýu ChatGPT-niň (GPT-4o) bir soraga jogap bermek üçin, takmynan, 0,3 Wt/sag sarp edýändigini anyklady – bu öň çak edilen 3 Wt/sag energiýadan 10 esse azdyr diýip, Android Headlines belleýär.
Ýu öňki hasaplamalaryň könelişen maglumatlara esaslanandygyny we onuň OpenAI-iň öz modelleri üçin has köne we az netijeli çipleri ulanmagyny göz öňünde tutandygyny belleýär. Deňeşdirmek üçin, EA tarapyndan energiýanyň sarp edilişi hojalyk enjamlarynyň köpüsinden ep-esli azdyr. Mundan başga-da, kompaniýalar neýroulgamlaryň netijeliligini gowulandyrmagy dowam etdirýär. Häzirki EA çipleri has kuwwatly bolup, az energiýa talap edýär.
Bellemeli ýeri, Epoch AI-iň hasaplamalary-da çen-takmyn bolup, ol çat-botuň şekil döretmek ýaly käbir funksiýalaryny göz öňünde tutmady. Hünärmeniň aýtmagyna görä, şeýle “ýüz tutmalar” adaty soragdan has köp energiýa sarp edip biler.
Şeýle-de, tehnologiýalaryň ösmegi elektrik energiýasynyň sarp edilişiniň artmagyna getirer. Çylşyrymly modeller has köp hasaplaýyş kuwwatyny talap edýär, sebäbi geljekki EA modelleri adamzat derejesinde dürli meseleleri çözmäge gönükdirilýär.
“EA ösmegini dowam etdirer, ony okatmak bolsa has köp çeşme talap eder. Geljekde bu ulgamlar häzirkiden has çylşyrymly wezipeleri ýerine ýetirip, has güýçli işlär” – diýip, Joşua Ýu belledi.
