OpenAI kompaniýasynyň baş müdiri Sem Altman GPT-4.5 we GPT-5 emeli aň (EA) modelleri barada giňişleýin maglumat berdi diýip, «The Verge» neşiri habar berýär.
Altman X sosial torundaky ýazgysynda OpenAI-yň önümleriniň hatarynyň çylşyrymlaşandygyny we olary ýönekeýleşdirmek üçin işleriň geçiriljekdigini aýtdy.
«Bizem edil siz ýaly, model saýlamagy ýigrenýäris we jadyly bitewi [emeli] aňa dolanmak isleýäris» diýip, Altman ýazdy.
Kompaniýa içerki atlandyrylşy «Orion» bolan GPT-4.5 modelini çykarmagy meýilleşdirýär. Altmanyň aýtmagyna görä, bu model OpenAI kompaniýasynyň «iň soňky pikirlenmeýän modeli» bolar. Belläp geçsek, aslynda kompaniýa «Orion» modelini geçen ýylyň oktýabr aýynda türgenleşdirip başlapdy, soňra bolsa uly mukdardaky çykdajylar we maglumat ýetmezçiligi bilen ýüzbe-ýüz bolupdy.
«Biziň esasy maksadymyz – "o" seriýasyndaky modelleri we GPT seriýasyndaky modelleri birleşdirip, ähli gurallarymyzy ulanmagy başarýan, haçan uzak pikirlenmelidigini, haçan pikirlenmeli däldigini bilýän hem-de dürli meseleleri çözmäge ýardam berýän ulgamlary döretmek» diýip, Altman paýlaşdy.
ChatGPT we OpenAI API arkaly kompaniýa «o3-i hem hasaba almak bilen, köp sanly tehnologiýalary birleşdirýän ulgam hökmünde GPT-5-i çykarmagy» meýilleşdirýär diýip, Altman belleýär. Şeýle-de ol «o3-üň mundan beýläk garaşsyz model hökmünde hödürlenmejekdigini» aýtdy. Ýatlatsak, kompaniýa dekabrda «o3-i» hödürläpdi, fewralda bolsa «o3-mini» hemme kime üçin mugt elýeterli bolupdy.
Şeýle-de tölegli Plus abunalary geljekde GPT-5-i «has ýokary aň derejesinde», Pro abunalary bolsa «has hem ýokary aň derejesinde» ulanyp bilerler.
Altman GPT-4.5 we GPT-5-iň haçan çykjakdygy barada anyk maglumat aýtmady, ýöne «hepdelere/aýlara» çekip biljekdigini mälim etdi.
