OpenAI indi ChatGPT-niň mugt wersiýasynda elýeterli bolan täze dil modeli o3-mini-niň çykandygyny habar berdi. Ol öňki modellerden has tiz işleýär we “pikir ýöretmek” başarnygy bilen tapawutlanýar.
Ilkibaşda model OpenAI-iň 12 günlük premýera marafonynyň çäklerinde anons edildi.
Startapyň baş müdiri Sem Altman modeliň “birnäçe hepdeden çykjakdygyny” aýtdy we kompaniýa beren wadasynda durdy. o3-mini o1 modelinden tizligi boýunça 24% öňe geçip, matematika, programmirleme we ylmy dersler bilen baglanyşykly meselelerden gowy baş çykarýar.
Ulanyjylar ChatGPT-de çat panelinde Reason (“Delillendir”) funksiýasyny saýlap, o3-mini-ni mugt synap biler. Çäklendirmeler GPT-4o bilen deň bolar.
ChatGPT Plus we Teams wersiýalarynyň tölegli ulanyjylary günde 150 habarnama iberip biler, ChatGPT Pro-ny ulanyjylar bolsa aýda 200 dollar baha bilen modeli çäklendirmesiz ulanyp biler.
Tölegli ulanyjylara o3-mini-high modeli-de elýeterli bolar. Kompaniýanyň aýtmagyna görä, ol “ChatGPT-de programma koduny ýazmak üçin iň gowy wariant bolup”, has ýokary aň derejesi bilen jogap hödürlär. Mundan başga-da, o3-mini internetde gözlemegi goldap, web-çeşmelere salgylanmalar bilen jogaplary tapmaga mümkinçilik berer.
