Anthropic kompaniýasy özüniň Claude çat-botuny ösdürmekde ulanylyp bilinjek ahlak ýörelgeleri ara alyp maslahatlaşmak üçin dünýäniň dürli din wekilleri bilen birnäçe duşuşyk geçirdi.
Hristian liderleri bilen geçirilen ýapyk maslahatlardan soň, Anthropic we OpenAI kompaniýalarynyň degişli işgärleri Nýu-Ýorkda geçirilen Faith-AI Covenant atly tegelek stoluň başyndaky dinara söhbetdeşlige gatnaşdylar. Bu maslahatlara hristianlaryň, ýahudylaryň, induizmiň, sikhizmiň we mormon buthanasynyň din wekilleri gatnaşdy.
Anthropic bu maslahatlaryň Claude-yň ösüşine nähili täsir etjekdigini açyk aýtmaýar. Ýöne kompaniýa öz wagtynda emeli aňyň eýermeli ahlak ýörelgelerinden ybarat bolan «konstitusiýa» barada mälim edipdi.
Kompaniýanyň hünärmenleri generatiw EA üçin ähliumumy ahlak kadalaryny döretmegiň çylşyrymlydygyny boýun alýarlar. Şol sebäpli işläp düzüjiler ahlak çemeleşmeleriň daşarky çeşmelerini, şol sanda dini guramalaryň tejribelerini öwrenip başladylar.
Maslahatlara britaniýaly syýasatçy we sanly howpsuzlyk hünärmeni Joanna Şilds hem goşuldy. Heniz kompaniýalar bu duşuşyklardan alnan anyk teklipleri äşgär etmediler, şeýle-de dini ýörelgeleriň Claude ulgamyna girizilendigi barada habar bermediler.
Humane Intelligence guramasynyň ýolbaşçysy Rumman Çoudhury, tehnologiýa kompaniýalarynyň ähli ulanyjylar üçin umumy ahlak ýörelgelerini döretmegiň kynçylygyna kem-kemden düşünip başlandygyny aýtdy. Onuň sözlerine görä, din çylşyrymly ahlak ýagdaýlary bilen işlemekde esasy usullaryň biri bolmagynda galýar.
