4-nji martda Aşgabatda “ÝB – Merkezi Aziýa” sammitine taýýarlyk meselelerine bagyşlanan 20-nji ministrler duşuşygyny geçirmek meýilleşdirilýär. Bu barada "Nebit-Gaz" elektron neşiri Interfaks agentligine salgylanyp habar berýär.
Ministrler duşuşygynda 3-4-nji aprelde Özbegistanda geçiriljek “ÝB – Merkezi Aziýa” Birinji sammitine taýýarlyk maslahatlaşylar. Samarkantda Özbegistanyň Prezidenti Şawkat Mirziýoýewiň başlyklyk etmeginde geçiriljek sammite Ýewropa Geňeşiniň ýolbaşçysy Antoniu Koştanyň, Ýewropa Komissiýasynyň başlygy Ursula fon der Lýaýeniň, Gazagystanyň, Gyrgyzystanyň, Täjigistanyň we Türkmenistanyň Liderleriniň gatnaşmagyna garaşylýar.
“Sammit Ýewropa Bileleşigine Merkezi Aziýa bilen ikitaraplaýyn gatnaşyklary çuňlaşdyrmak we sebit hyzmatdaşlygyny giňeltmek boýunça geosyýasy gyzyklanmasyny görkezmek üçin möhüm mümkinçilik bolar” diýlip, ÝB-niň Daşkentdäki wekiliýetiniň ýaýradan metbugat beýanatynda aýdylýar.
Metbugat beýanatyna görä, sammitiň dowamynda "Ýewropa Bileleşiginiň özara gyzyklanma bildirýän ugurlarda hyzmatdaşlygy giňeltmäge ygrarlydygyny tassyklajakdygy, şol sanda sebitiň özünde we ÝB bilen ulag hem-de sanly utgaşyklylygy, strategik çig mal serişdelerini, ykdysadyýeti we howpsuzlygy, arassa we netijeli energiýa çeşmelerine geçişi öz içine alýandygy" nygtalýar.
