ChatGPT-niň işläp düzüjisi bolan OpenAI kompaniýasy Amerikanyň milli futbol ligasynyň (NFL) iň abraýly çäresi bolan «Super Bowl» çempionlyk ýaryşynyň göni ýaýlymynda görkezilen 60 sekuntlyk mahabat üçin 14 million dollar sarp etdi diýip, The Verge neşiri ýazýar.
OpenAI kompaniýasy «Super Bowl» göni ýaýlymynda mahabat üçin wagt satyn alan ilkinji emeli aň kompaniýasy boldy. Bu ýaryşyň 2024-nji ýylda geçirilen finalyna 123 milliondan gowrak adam göni ýaýlymda tomaşa edipdi. Bu görkeziji 1969-njy ýyldaky Aýa gonuş wakasynyň 150 millionlyk tomaşaçysyndan soň ikinji orunda durýar.
Bir minutlyk mahabatda adamzadyň taryhyndaky tehnologik ösüşler görkezilýär – ody ulanmakdan we tigri döretmekden başlap, DNK-nyň yzygiderliligini kesgitlemek, kosmos gözlegleri ýaly häzirki zaman üstünliklerine çenli. Mahabatyň iň möhüm pursaty bolsa häzirki zaman emeli aň programmalarynyň, şol sanda ChatGPT-niň mümkinçilikleriniň görkezilişi boldy.
Täsin we innowasion çemeleşmesine garamazdan, OpenAI ýokary çykdajylary sebäpli tankytlanyldy. Millionlarça adam 14 million dollar bilen Hytaýyň DeepSeek emeli aň modeli ýaly iki sany emeli aň modelini türgenleşdirip boljakdygyna ynanýar.
