Hytaýly startap DeepSeek tehnologiýa dünýäsini haýran galdyrmagy dowam edýär. Startapyň emeli aň (EA) modeli işe girizilenden bary-ýogy 20 günden soň 20 million aktiw ulanyjyny özüne çekdi diýip, TrendForce habar berýär.
Neşiriň maglumatlaryna görä, DeepSeek dünýäniň iň meşhur emeli aň programmalarynyň arasynda ChatGPT-den soň ikinji orunda durýar. Üçünji orunda bolsa TikTok wideoplatformasynyň eýesi ByteDance-yň Doubao atly emeli aň ulgamy ýerleşýär.
Şu ýylyň 11-nji ýanwarynda işe girizilen DeepSeek, 31-nji ýanwara çenli gündelik 22,15 million aktiw ulanyjyny özüne çekdi. Bu görkeziji 53,23 million gündelik ulanyjysy bolan ChatGPT-niň ulanyjylarynyň 41,6%-ine deňdir. Mundan öň Hytaý bazarynyň lideri 17 million gündelik ulanyjysy bilen Doubao bolupdy, emma DeepSeek ony yzda galdyrmagy başardy.
DeepSeek-iň üstünlikleri Apple App Store reýtinglerinde hem görnüp dur. Programma ABŞ-ny hem hasaba almak bilen jemi 157 ýurtda birinji orna çykdy. Şeýle-de SimilarWeb-iň maglumatlaryna görä, DeepSeek-iň diňe web sahypasy bary-ýogy bir hepdäniň dowamynda Google Gemini-niň ulanyjy sanyny geçdi. Ýanwar aýynyň 31-ine görä, ABŞ-dan DeepSeek-iň web sahypasyna giren ulanyjylaryň sany 2,4 milliona, Gemini-niňki bolsa 1,5 milliona ýetdi.
